အင်တာဗျူးမှာ...

`မှတ်ပုံတင်ပါလာသလား´
`ဟုတ်ကဲ့´

ရှေ့တည့်တည့်က စားပွဲရှည်ကြီးနောက်မှာ ထိုင်နေကြသော လူကြီးငါးယောက်အနက် အလယ်က လူကြီးက နကျယ်ကောင့် မှတ်ပုံတင်ကို ကြည့်လိုက် နကျယ်ကောင်ကို ပြန်မော့ကြည့်လိုက်ဖြင့် ခေါင်းတဆတ်ဆတ် ငြိမ့်လိုက်သည်။

`ကဲ...၊ မေးခွန်းလေးတွေ စလိုက်ကြရအောင်´
`ဟုတ်ကဲ့´

ထိုင်နေတဲ့ ခန္ဓာကိုယ်က သတိအနေအထား ခပ်မတ်မတ်ဟန် အလိုလိုဖြစ်သွားမလားတော့ မပြောတတ်... ... ...။

***

`နကျယ်ကောင်၊ နင်ဆယ်တန်းအောင်ပြီးကတည်းက လတ်လျားလတ်လျားနဲ့၊ ဒီတိုင်းနေမယ့် အတူတူ ရော့၊ အဲဒီမှာ Male Nurse လျှောက်ချေ၊ ငါ ဖောင်ယူလာတယ်၊ ဖြည့်လဲဖြည့်ပြီးပြီ။ Bio တွေ ပြန်ကျက်ထားစမ်း၊ ဘားအံမှာ သွားဖြေရမယ်´

ဟုတ်တော့လဲ ဟုတ်သည်။ ဆယ်တန်းအောင်ပြီးကတည်းက အမျိုးတွေ ရှိတဲ့ ကြခတ်ချောင်းကို သွားလိုက်၊ မြို့ကလေးကို ပြန်လာလိုက်၊ ညညဆို အပြင်ထွက်လည်လိုက်၊ အုတ်ခုံမှာ ဂီတာတဒေါင်ဒေါင်လုပ်လိုက်နဲ့ နကျယ်ကောင်က မေမေ မျက်စိနောက်မယ်ဆိုလဲ နောက်စရာ... ...။

မေမေက သူ့ကို Male Nurse ဘာကြောင့် အလုပ်ခိုင်းချင်နေရပါလိမ့်ဆိုတာ နကျယ်ကောင် စဉ်းစားလို့တော့မရ။ အမယ်၊ မေမေယူလာတဲ့ ပြက္ခဒိန်ထဲမှာကျတော့ အမျိုးသားသူနာပြု ဘယ်သူဆိုလား၊ စတိုင်လ်က ခပ်ထွားထွား၊ ဘေးမှာကလဲ သူနာပြုမလေးနှစ်ယောက်က ဘယ်တယောက် ညာတယောက်ရပ်လို့၊ နက်ခ်တိုင်နဲ့ နားကျပ်နဲ့၊ ရှိုးဘောင်းဘီနဲ့၊ ဂျူတီကုတ်နဲ့ ဘာနဲ့ဆိုတော့ ဆရာဝန်လိုလို ဘာဂလိုတိုတိုပါလား ဆိုပြီး အငေးသားတော့ဖြစ်သွားသည်။
ဘားအံမှာလဲ သွားဖြေရဦးမတဲ့။ ဘားအံကိုက တခါမှရောက်ဖူးတာ မဟုတ်သေး။ သွားဖြေရရင်တော့ မိဘတွေမပါတဲ့ ခရီးဝေးကို သူငယ်ချင်းတွေနဲ့ လွတ်လွတ်လပ်လပ် သွားလည်ရချည်သေးရဲ့ ဆိုပြီး အသာတကြည် ခေါင်းငြိမ့်ဖြစ်ခြင်းပင်။

ဒီလိုနဲ့ ... ... ...။

ဘားအံမှာ သူနာပြုရေးဖြေအဆင့်ကို အောင်လို့၊ အခုနောက်တခေါက် အနေနဲ့ နှုတ်ဖြေဖြေဖို့အတွက် အင်တာဗျူးမည့် လူကြီးများရှေ့ အခုလို ဆိုက်ဆိုက်မြိုက်မြိုက် ရောက်နေရခြင်းပင် ဖြစ်တော့သည်။

***

ဘေးအစွန်အကျဆုံး လူကြီးက နကျယ်ကောင်ကို မေးခွန်းတခု စမေး၏။

`မင်း၊ ကိုးတန်းနဲ့ဆယ်တန်းမှာတုန်းက Bio သင်ခဲ့ရမှာပေါ့´
`ဟုတ်ကဲ့´
`ဒါဖြင့်၊ တီကောင်က ဘယ်လိုမျိုးပွားသလဲကွာ´
`ဟို... ...၊ အထီးနဲ့အမ သားစပ်ပြီး ပွားပါတယ်ဆရာ´
`ဟေ´

`ဒါတော့ မင်းပြောမှလားကွ´ ဆိုပြီး တဟားဟားနဲ့ထရယ်ကြသည်။ ပြီးမှ...

`ငါမေးတာက၊ တီကောင်ဟာ၊ ဥနဲ့သားပေါက်သလား၊ အကောင်နဲ့သားပေါက်သလား မေးတာကွ´

နကျယ်ကောင့်စိတ်ထဲ တချက်တော့ တွေဝေသွားသည်။ တီကောင်က ဥနဲ့ပေါက်လား၊ အကောင်နဲ့ပေါက်လားတဲ့။ အကောင်နဲ့ပေါက်ရင်တော့ နို့တိုက်ကြတာကများတယ်၊ တီကောင်က နို့တိုက်ပါ့မလား၊ တီနို့ဆိုတာတော့ ငါတခါမှ မကြားဖူးဘူး။ ဥနဲ့ပေါက်တာပဲဖြစ်ရမယ်ကွာ။

`ဥနဲ့ပေါက်တာပါ ဆရာ´

မေးခွန်းမေးသူ လူကြီးက တပြုံးပြုံးနှင့် ငြိမ်သွားသည်။ အဖြေက မှန်သလား မှားသလားတော့ မသိ။

***

နောက်တယောက်က ဆရာမဖြစ်ဟန်တူသူ အသက်ခပ်ကြီးကြီးနဲ့ မိန်းမကြီးတယောက်။

`မင်းအခု ဘယ်မှာတည်းနေလဲ´
`သီးသန့် တည်ခိုခန်းမှာပါ´
`ဒါဖြင့် ဒီပြည်နယ်ရုံးကိုလာတော့ ဘယ်လမ်းကလာသလဲ´
`အထက (၁) ဘေးက လမ်းကတဆင့် မြင်းလှည်းနဲ့လာတာပါ´
`ဒါဆို ဘားအံဆေးရုံကြီးရှေ့က ဖြတ်ခဲ့ရမှာပေါ့´
`ဟုတ်ကဲ့´
`အေး၊ ဒါဖြင့် အဲဒီဆေးရုံရှေ့မှာ ဆိုင်းဘုတ် ဘယ်နှစ်ခု ထူထားသလဲကွာ´

`ဗုဒ္ဓေါ၊ ငါဘယ်လိုမှ ထင်မထားတဲ့ မေးခွန်းပါလား´ လို့ တွေးမိပြီး နကျယ်ကောင်တယောက် အတွေးထဲမှာ အလုပ်များသွား၏။ ဆေးရုံရှေ့က ဖြတ်တော့ဖြတ်လာတာ မှန်ပေမယ့် ဆိုင်းဘုတ် ဘယ်နှစ်ခုရှိသလဲဆိုတာကတော့ သတိမထားမိလိုက်တာ အမှန်...၊ မြွေအန္တရာယ် ကာကွယ်ရေး ဆိုင်းဘုတ်တခုတော့ တွေ့လိုက်သလိုလို။ ဉာဏ်နီဉာဏ်ပြာဉာဏ်ဝါတွေ ထုတ်စမ်း...၊ ထုတ်စမ်း။

ဆေးရုံဆိုတော့ `ဒို့တာဝန် အရေးသုံးပါး´ ဆိုင်းဘုတ်တော့ သေချာပေါက်ရှိမှာပဲ၊ အင်းး ပြည်သူ့ဆေးရုံကြီး ဆိုတဲ့ ဆိုင်းဘုတ်တခုကလဲ သေချာပေါက်ပေါ့။ စောစောက ငါမြင်ခဲ့တဲ့ မြွေအန္တရာယ်ကာကွယ်ရေး ပညာပေးဆိုင်းဘုတ်က တခု၊ ဒီတော့ သုံးခု။ အေအိုင်ဒီအက်စ် ပညာပေးတွေ ဘာတွေလဲ စိုက်ချင်စိုက်ထားမှာပဲ၊ သြော်၊ ပိုလီယိုကာကွယ်ဆေး တိုက်ကျွေးကြပါစို့ဆိုတာ အခုတလော နေရာတိုင်းတွေ့နေရသေးတယ်၊ ဆေးရုံရှေ့ဆိုတော့ ရှိချင်ရှိနေမှာ၊ ကဲ... လာလေ့ကွာ။ နောက်ထပ် အပိုနှစ်ခုလောက် ထည့်ပေါင်းလိုက်မယ်။

`၇ ခုပါ ဆရာမ´
`ဘာတွေလဲ´
`ဒို့တာဝန်အရေးသုံးပါး၊ ပြည်သူ့ဆေးရုံကြီး၊ မြွေအန္တရာယ်ကာကွယ်ရေး၊ အေအိုင်ဒီအက်စ်ပညာပေး၊ ပိုလီယိုကာကွယ်ဆေး တိုက်ကျွေးဖို့၊ ပြီးတော့ ... ... ...´
`ငရွှီး´

`တိန်´ ဟု စိတ်ထဲက ကြိတ်အော်ပြီး နကျယ်ကောင် ပါးစပ်ပိတ်သွား၏။

ဒီလိုနဲ့ မေးခွန်းပေါင်းစုံတွေကို တယောက်တလှည့်စီ မေးလိုက်တာ၊ နကျယ်ကောင်ဖြေသမျှကို သူတို့က ရယ်စရာတွေချည်းသာ ဖြစ်နေလေတော့သည်။ နောက်ဆုံးမေးတဲ့ ဆရာတယောက်က...

`မင်း၊ အခု အင်တာဗျူးကို အောင်မယ်ထင်သလားကွ´
`ဟုတ်ကဲ့၊ ဆရာတို့ အအောင်ပေးရင် အောင်မှာပါ´
`ဟေ´

ရယ်ချင်လဲ ရယ်ကြပါစေတော့လေ... ... ...။


***

တကယ်လဲ နကျယ်ကောင် တယောက် အဲဒီ အမျိုးသားသူနာပြု နှုတ်ဖြေကို မအောင်လိုက်ပါ။ အောင်ခဲ့ရင်တော့ နကျယ်ကောင်ရဲ့ ဘ၀ အချိုးအကွေ့က အဲဒီမှာတင် အပြောင်းအလဲ တခု ဖြစ်ခဲ့မည် ထင်ပါရဲ့။

***

ကလိုစေးထူး