ခရစ်စမတ်တော့ ပြီးဆုံးသွားခဲ့ပါပြီ။ သိပ်မကြာခင်ရက်ပိုင်းမှာ နှစ်ဟောင်းကုန်လို့ နှစ်သစ်ကူးပါတော့မယ်။ ကျန်ခဲ့တဲ့ နှစ်ဟောင်းမှာ အမှားပရပွ၊ ဒေါသတွေ များစွာနဲ့ ဆုံးရှုံးမှုတွေ နာကျင်မှုတွေလဲ အနန္တဖြစ်ခဲ့တာ မနည်းပါဘူး။ အကောင်းဘက်က တွေးရင်တော့လဲ ဒီတနှစ်မှာ အသိမိတ်ဆွေ အသစ်အသစ်တွေ အရင်ကထက် အများကြီး ပိုရလာခဲ့ပါတယ်။ မုန်းသူတွေလဲ မနည်းပေါ့။
ဘယ်လိုပဲ ဖြစ်ဖြစ်ပေါ့ခင်ဗျာ။ လာမယ့် နှစ်သစ်ကို ကြိုတင် ရင်ခုန်ရင်းနဲ့ လေးလုံးစပ် ကဗျာ တပုဒ် ရေးကြည့်မိပါတယ်။ ကဗျာနာမည်က နှစ်သစ်စိတ်ကူး တဲ့။
နှစ်သစ်စိတ်ကူး
နှစ်တနှစ်တာ
အဆုံးမှာ
သာယာရွှင်လန်း ကျန်းမာစေ။
ငိုကြွေးသူတွေ
အပြုံးဝေ
မျက်ရေ(ရည်) တွေလဲ ခန်းနိုင်စေ။
ရန်လိုမုန်းထား
ပြုသူများ
အမှား နောင်တရနိုင်စေ။
တို့မျှော်လင့်ချက်
အသက်ဆက်
ထက်မြက် ယုံကြည်ခိုင်ခန့်စေ။
လျှောက်သောလမ်းထဲ
မယိုင်လဲ
ရဲစွဲ စိတ်ဓာတ် ရှင်သန်စေ။
လာမည့် နှစ်သစ်
အမှားပစ်
ထားရစ်နိုင်စေ ရန်ကြွေးတွေ။
နှစ်ဟောင်းဖယ်ခွာ
နှစ်သစ်မှာ
မေတ္တာထားလို့ ပြုံးပျော်စေ။
လေးလုံးစပ် ကဗျာကတော့ ပြီးသွားပါပြီ။ ဒါပေမယ့် ကျနော်တယောက် အရစ်က ရှည်ချင်သေးတယ်ခင်ဗျ။ အဲဒါနဲ့ အဲဒီ လေးလုံးစပ် ကဗျာကိုပဲ ကာရန်မဲ့ကဗျာ အဖြစ် ပြောင်းလဲ ရေးကြည့်မိပြန်ပါတယ်။ ဖတ်ကြည့်ပေးပါအုံး ခင်ဗျာ။
နှစ်သစ်စိတ်ကူး
ပြီးဆုံးသွားတဲ့ တနှစ်တာမှာ
ပျော်ရွှင်သာယာ ရွှင်လန်းခဲ့ကြပါစေ။
ငိုနေသူတွေရဲ့ မျက်ရည်တွေလဲ
ခန်းခြောက်လို့ အပြုံးဆင်နိုင်ပါစေ။
ရန်လိုသူတွေရဲ့
မုန်းတီးမှုတွေလဲ နောင်တတရားအဖြစ်
ပြောင်းလဲ ပစ်ကြပါစေတော့။
ကျနော်တို့ မျှော်လင့်ချက်တွေကို
အသက်ဆက်လို့ ပိုမိုခိုင်မာကြမယ်။
ကျနော်တို့ လျှောက်နေတဲ့ လမ်းကို
စွဲစွဲမြဲမြဲ ရဲရဲရင့်ရင့် ဆက်လျှောက်ကြမယ်။
အို..မိတ်ဆွေ
ထားခဲ့ပါတော့ ဒီရန်ကြွေးတွေ
လွှင့်ပစ်လိုက်ပါ ဒီအမုန်းတွေ။
ဖယ်ခွာပစ်ရတော့မယ့် နှစ်ဟောင်းကနေ
ပြုံးပျော်စွာနဲ့
နှစ်သစ်မှာ မေတ္တာ ထားကြပါစို့။
ကဲ.. အရစ်ရှည်ခြင်းလဲ ပြီးဆုံးပါပြီခင်ဗျာ။ အားလုံးကို ကျေးဇူးပါ။
ကလိုစေးထူး
Wednesday, December 27, 2006
Subscribe to:
Post Comments (Atom)
2 comments:
နှစ်သစ်စိတ်ကူးလေး ကောင်းပါတယ်၊ တကယ်လည်း အားလုံး အဲဒီအတိုင်းဖြစ်ရင် ပိုကောင်းမယ်။
အဲဟီကဗျာကြိုက်တယ်
Post a Comment