ဒီတခါ ကျနော့်အကြိုက် အဖြစ် တင်ပြမယ့် ၀တ္ထုတိုလေးကတော့ ၂၀၀၇ခုနှစ်၊ ဇန်န၀ါရီလထုတ် မဟေသီမဂ္ဂဇင်းမှာ ပါရှိတဲ့ ဆရာလေးစိုး(ဒေးဒရဲ) ရဲ့ `သူတော်ကောင်း အတ္ထုပ္ပတ္တိ´ ဆိုတဲ့ အတိုဆုံး ၀တ္ထု စာတွဲလေးပါ။ အားလုံး ဖတ်ရှုနိုင်ဖို့ ဝေမျှလိုက်ပါတယ်။ ခံစားကြည့်ကြပါအုံး..။
ကလိုစေးထူး
သူတော်ကောင်း အတ္ထုပ္ပတ္တိ
(၁)
မနက်ခင်း မျက်နှာသစ်ရင်း…
`သူတော်ကောင်းတို့နှင့် ပေါင်းဖက်လျှင် ပညာဗဟုသုတရသည်။ ဥစ္စာစီးပွား တိုးတက်သည်။ သူယုတ်မာနှင့် ပေါင်းဖက်လျှင် အကျင့်စာရိတ္တ ပျက်သည်။ ဥစ္စာစီးပွား ဆုတ်ယုတ်သည်။
(၂)
နေ့လယ်ခင်း ကားစီးရင်း… ။
လိုင်းကားဖြင့် ခရီးသွားရသည်မှာ မလွယ်လှပေ။ နေရာရဖို့ အတွက် တိုးဝှေ့တွန်းတိုက်ပြီး တက်ရသည်။ နေရာ ရတော့ရသည်။ တွဲခိုမတ်တပ် တခဏပေါ့။ ကားခထုတ်ပေးရန် အိတ်ထဲသို့ လက်နှိုက်နေတုန်း `သူတော်ကောင်းတွေ မတောင်းဘဲနဲ့ ပေးတယ်နော်´ ဆိုသည့် ကားစပယ်ယာ၏ ကားခ တောင်းသံကြောင့် ကျနော် လန့်သွားခဲ့ရသည်။ ကားစပယ်ရာ ပြောလိုက်သည့် စကားကို ဆန့်ကျင်ဘက်တွေးလိုက်မိသော် ကားခမပေးဘဲ နေလျှင် ဘာဖြစ်သွားမည်နည်း။
ဘတ်စ်ကားပေါ်မှာ ဖြစ်သည်။
(၃)
ညနေခင်း အပန်းဖြေရင်း…။
`ဒီနေ့ ဥပုသ်နေ့တော့..။ ရှင်မသိဘူးလား။ ကျုပ်က ဘုရားရှိခိုး၊ ပုတီးစိပ် လုပ်နေတာ။ ရှင့်လို အရက်သောက်ပြီး မူးရူးနေတာ မဟုတ်ဘူး။ အရက်မူးလာရင် မိန်းမကိုပဲ ရန်ရှာချင်တယ်။ ရှင် လူယုတ်မာ …..´
`ဟုတ်ပါတယ်၊ မင်းက သူတော်ကောင်းကြီးကိုး´
`ဟုတ်တယ်၊ ကျုပ်က သူတော်ကောင်း´
ခေါင်းရင်းအိမ်မှ လင်မယား ရန်ဖြစ်နေသံ ဖြစ်သည်။
(၄)
မနက်စောစော လွယ်အိတ်ဆွဲပြီး အလုပ်ထဲသို့ ထွက်လာခဲ့သည်။ လမ်းသွားရင်း စားဖို့ လမ်းဘေးက အဒေါ်ကြီးဆိုင်မှာ ကွမ်းယာ ၀င်ဝယ်လိုက်သည်။
`အဆိမ့်နဲ့ ကွမ်းတရာဖိုး ပေးပါအဒေါ်´ ဟု ပြောပြီး တရာကျပ်တန် တရွက် ထုတ်ပေးလိုက်သည်။ ကွမ်းယာသည် အဒေါ်ကြီးသည် ကျနော် ထုတ်ပေးလိုက်သော တရာတန်ဖြင့် ကွမ်းပုံနှင့် ကွမ်းယာပစ္စည်းများကို ရိုက်ပုတ်ပြီး `ကဲ…. ကဲ၊ သူတော်ကောင်း ပိုက်ဆံရှင်´ ဟု ပါးစပ်မှ အသံထွက်ကာ လာဘ်ခေါ်နေသည်။
ကျနော် တွေးကြည့်မိသည်။ လူတွေဟာ သူတော်ကောင်းတရားကို မြတ်မြတ်နိုးနိုး ခင်တွယ်တတ်ကြသည်။ ချစ်ခင် စုံမက်တတ်ကြသည်။ သူတော်ကောင်း စိတ်ရှိသူသည် နေရာတရာတွင် မျက်နှာ ပွင့်လန်းနေသည်။ သူတော်ကောင်း အတ္ထုပ္ပတ္တိကား ဂန္ထ၀င် မြောက်ပြီး အလွန် တန်ဖိုး မြင့်မားပါလား ဟူ၍ပင်။
ကွမ်းယာဆိုင်ထဲမှာ ကျနော်ပြန်ထွက်လာတော့ ကျနော်တို့ လမ်းထိပ်က အလှူခံဌာနမှ အသံချဲ့စက်ဖြင့် အလှူခံနေသည်ကို ကြားရပြန်သည်။ `သဒ္ဓါ၊ သီလ၊ သုတ၊ စာဂ၊ ပညာ၊ ဟိရီ၊ သြတ္တပ္ပ ဆိုတဲ့ သူတော်ကောင်း တရားများနဲ့ ပြည့်စုံကြပါစေ´ တဲ့ဗျာ။
လေးစိုး (ဒေးဒရဲ)
No comments:
Post a Comment