နှောင်းလုလု ဆောင်း…

တဆောင်း ယွန်းလုခဲ့ပြန်ပါပြီ။

အရည်ပျော်လက်စ နှင်းဖြူလွှတွေက ဟိုတကွက် ဒီတစဖြင့် အားခဲ မာန်တင်းနေဆဲမှာပဲ နေ့အပူချိန်၊ ညအပူချိန်တို့ကလည်း နွေးထွေးမှုဘက်ကို ပိုလို့ အားသာလာခဲ့ပါတယ်။ နေရာင်လင်းချင်းတဲ့ ရက်တွေ ပိုများလာတာနဲ့ အမျှ နှင်းတွေရဲ့ လက်မြှောက် အရှုံးပေးရတဲ့ သင်္ကေတ မျက်ရည်စက်တွေက လမ်းမပေါ်မှာ ဟိုမှာ ဒီမှာ စီးဆင်းလို့ နောက်ဆုံးမှာတော့ ရေနုတ်မြောင်းတွေ ရှိရာကို စီးဆင်းလို့ နေပါတယ်။

မီးလောင်ပြင် တစလို ဖြစ်နေတဲ့ သစ်ပင်ခြောက်တွေမှာတော့ အဖူးအငုံတခုတလေမှ မတွေ့ရသေးပါဘူး။ သစ်ကိုင်းခြောက် ပရပွနဲ့ တောတန်းထဲမှာ ဟိုဟိုဒီဒီ ပြေးလွှားနေတတ်တဲ့ ရှဥ့်တချို့နဲ့ ယုန်ညိုညိုလေး တကောင်တလေကတော့ ဆောင်းတွင်းကာလကို ငြီးငွေ့နေပြီလား မသိနိုင်ပါ။ အစာတခုခု တွေ့လို တွေ့ငြားနဲ့ နှင်းဖတ်တွေကို ယက်ဖယ်လိုက် အပင်ခြေ တခုခုမှာ တဂျစ်ဂျစ်နဲ့ အလုပ်ရှုပ်နေလိုက်နဲ့…။

တလောက ဟိုဘက်မြို့ကလေးကို သွားတော့ လမ်းမှာ သမင်နှစ်ကောင်က ကားလမ်းကို ဖြတ်ကူးနေခိုက်နဲ့ ဆုံလိုက်ပါသေးတယ်။ သူတို့ အသက်အန္တရာယ်ကို ရန်ရှာမယ့် ပုဂ္ဂိုလ်တွေကို ဥပဒေနဲ့ တားမြစ်ထားတာမို့ လွတ်လပ်ပေါ့ပါးနေတဲ့ အဲဒီ သမင်နှစ်ကောင်က ကားလမ်းကို အေးဆေးစွာပဲ ဖြတ်ကူးနေတာကြောင့် လမ်းပေါ်မှာ ကားတွေ အတန်ကြာအောင် ပိတ်သွားပါသေးတယ်။ တခါတလေကျရင်တော့လဲ စိတ်မရှည်တဲ့ ကားသမားတချို့ရဲ့ လက်ချက်ကြောင့် ကားတိုက်ခံရပြီး ဇီဝိန်ကြွေရရှာတဲ့ တိရစ္ဆာန်ငယ်လေးတွေရဲ့ အသက်မဲ့ ခန္ဓာကို ကရုဏာသက်ဖွယ် မြင်နိုင်ပါတယ်။

ပြီးခဲ့တဲ့ စနေညမှာ ဒီနိုင်ငံက စံတော်ချိန်တွေကို တနာရီ အရှေ့ကို ပြန်တိုးလိုက်ပါတယ်။ တနှစ်ကို အခုလိုပဲ ရှေ့တိုးတာ တကြိမ်၊ နောက်ဆုတ်တာ တကြိမ် ပုံမှန်လုပ်လေ့ ရှိတဲ့ စနစ်ကို ဒီနိုင်ငံကို ရောက်စတုန်းကတော့ ထူးဆန်းနေခဲ့ပါသေးတယ်။ နောက်ပိုင်းမှာတော့လဲ တိုးဆိုတော့လဲ အလုပ်ကို တနာရီ စောပြီးသွားလိုက်၊ ဆုတ်ဆိုတော့လဲ တနာရီ နောက်ကျသွားလိုက်ရုံလို့ တွေးရင်းနဲ့ နေသားကျသွားတော့တာပါပဲ။

ဒီနှစ်အတွက် ကျနော်တို့ ပြည်နယ်ရဲ့ နှင်းကျတဲ့ စံချိန်ဟာ မနှစ်ကထက်စာရင် နှစ်ဆကျော်ကျော် ပိုများခဲ့ပါတယ်။ တခါများဆိုရင် တရက်တည်းကို ၁၄ လက်မလောက် အထိ နှင်းကျခဲ့ပါတယ်။ ကျောင်းတွေ အားလုံးပိတ်ခဲ့ပြီးတော့ အလုပ်အတော်များများလဲ ပိတ်ရက်ပေးခဲ့ပေမယ့် လောဘသမား ကျနော့် အလုပ်ရှင်ကတော့ အလုပ် မပိတ်ပေးခဲ့ပါဘူး။ ထူထဲ သိပ်သည်းစွာ ကျနေတဲ့ နှင်းထုတွေကလည်း ဘယ်လိုမှ ခံစားလို့မရနိုင်အောင်ကို အငြိုးကြီးလွန်းတာမို့ တချို့လူတွေမှာ အတော်လေး ဒုက္ခရောက်ရပါတယ်။

နှင်းတွေ အရမ်းကျတာကို ဂုဏ်ယူစွာနဲ့ပဲ ကျနော့်အလုပ်ရှင်က တရက်မှာ အလုပ်သမားအားလုံးကို နေ့လည်စာ ကျွေးခဲ့ပါသေးတယ်။ ကျနော်တို့ အမြင်မှာတော့ အထူးအဆန်း ဖြစ်နေပေမယ့် သူတို့ကတော့ နှင်းတွေ အများကြီးကျတာကို တကယ်ပဲ ပျော်ပါသတဲ့…။

အဲဒီပုံထဲမှာ မြင်ရတဲ့ ရေခဲပန်းဆိုင်းကြီးကလည်း ကျနော့် အိမ်တံစက်မြိတ်မှာ ကာလ အတန်ကြာအောင် နေရာယူခဲ့ပါသေးတယ်။ ဟိုတနေ့ကမှ ချွင်ကနဲ ပြုတ်ကျသံ ကြားလို့ ထွက်ကြည့်တော့မှ မြေကြီးပေါ်မှာ ပြန့်ကျဲနေတဲ့ ရေခဲတုံးတွေကို ဖွေးခနဲ တွေ့ရပါတယ်။

နောက်တလလောက် ဆိုရင်တော့ ၀န်းကျင်တခွင်မှာ ဖူးသစ်စ အရွက်၊အငုံတွေနဲ့ လှနေပါတော့မယ်။ စိမ်းလန်းတဲ့ မြက်ခင်းတွေက နှင်းတွေရဲ့ ဖိသိပ်ထားမှု အောက်ကနေ နိုးထလာကြပါဦးမယ်။ နေမင်းရဲ့ အလင်းရောင်က ရှည်လျားတဲ့ နေ့တာနဲ့အတူ လောကတခွင်ကို ထွန်းတောက်နေခွင့် ပိုလို့ ရနေဦးတော့မှာပေါ့…။

ကလိုစေးထူး