Monday, February 05, 2007

ဧည့်သည်ကြီး ကို ခံစားကြပုံများ...


ဘ၀ထဲက ရတနာ၊ ရင်ထဲကဗျာဆိုတဲ့ စာကို ခေတ်ပြိုင်ဝက်ဘ်ဆိုက်ထဲက ဆရာကြီးတင်မိုး အောက်မေ့ဖွယ်ကဏ္ဍမှာ ဖတ်ရှုလိုက်ရပါတယ်။ စာတပုဒ်၊ ကဗျာတပုဒ်ဟာ မက်ဆေ့အမျိုးမျိုးကို ပေးနိုင်ပုံနဲ့ ကဗျာ၊စာကို ဖတ်ရှုခံစားကြတဲ့ စာဖတ်သူတွေရဲ့ ခံစားဖွဲ့ဆိုပုံအမျိုးမျိုးကို ဒီဆောင်းပါး ဖတ်ပြီးရင် ပိုမို နားလည်ပေးနိုင်မယ်လို့ မျှော်လင့်ပါတယ်။

ဒီဆောင်းပါးမှာ ဆရာကြီးတင်မိုးဟာ သူ့ရဲ့ နာမည်ကျော် `ဧည့်သည်ကြီး´ ကဗျာကို မည်သို့မည်ပုံ ရေးဖြစ်တယ်ဆိုတာ ရှင်းပြထားပါတယ်။ ခေတ်ပြိုင်လင့်ခ်ကို ပေးပြီး ဖော်ပြချင်ပေမယ့် ခေတ်ပြိုင်ကို ၀င်ရောက်ဖတ်ခွင့်မရတဲ့ မြန်မာပြည်မှ မိတ်ဆွေများ အဆင်ပြေစွာဖတ်နိုင်အောင် ဒီထဲမှာပဲ ဖော်ပြလိုက်ပါတယ်။ ဖတ်ရတာ ပိုမိုအရသာ ရှိစေအောင် ဆရာကြီး ကိုယ်တိုင်ရေး စာမူကိုပါ ခေတ်ပြိုင်ဝက်ဘ်ဆိုက်မှ တဆင့် ကူးယူဖော်ပြပါတယ်။ ခေတ်ပြိုင်တာဝန်ရှိသူ တဦးဦးမှ ဒီဘလော့ခ်ကို ဖတ်ရှုဖြစ်ပါက နားလည်ခွင့်ပြုပေးနိုင်မည်ဟု မျှော်လင့်ကြောင်းပါ ခင်ဗျာ…။

ဘ၀ထဲက ရတနာ၊ ရင်ထဲက ကဗျာ (၁)

“ဧည့်သည်ကြီး”
ဆေးလိပ်လည်းတို
နေလည်းညိုပြီ
ငါ့ကို ပြန်ပို့ကြပါလေ။

ဒီကဗျာလေးကိုတော့ မှတ်မိကြတဲ့သူ တော်တော်လေးများတယ်။ စိတ်လဲဝင်စားကြတယ်။ ကဗျာရဲ့ အဓိပ္ပာယ် ဘာလဲလို့ မေးခွန်းတွေ ခဏခဏမေးကြတယ်။ ကျနော်ကလဲ မဖြေတတ်ဘူး။ ဒီကဗျာ ရေးမိပုံကလေးကို ပြောပါရစေအုံး။

၁၉၅၉ ခုနှစ်ဆန်းပိုင်းက ကဗျာဆရာဝင်းကြွယ်ရယ်၊ ဆရာမောင်စွမ်းရည်ရယ်၊ မုံရွာချောင်းဦးသား မောင်စောလွင် (အခုရှေ့နေကြီး) ရယ်၊ ရေစကြိုသား ကိုတင်အောင် (မန္တလေးမျိုးညွန့်ကြက်ခြံ) ရယ်၊ ကျနော်ရယ် မန္တလေးမီးရထားဘူတာဝင်းအရှေ့ဘက် ဟော်ကုန်းရပ်ကွက်ထဲမှာ အိမ်ခန်းငှားပြီး နေကြ တယ်။ အဲဒီတုန်းက ကျနော်တို့တတွေဟာ မန္တလေးတက္ကသိုလ်မှာစာသင်နေကြတဲ့ ကျောင်းသားတွေပေါ့။

ကျနော်တို့နေတဲ့အိပ်ခန်းက နှစ်ထပ်အိမ်အပေါ်ထပ်မှာ၊ အောက်ထပ်မှာက မန္တလေးဆေးတက္ကသိုလ်က ဆေးကျောင်းသားတွေနေကြတယ်။ မြင်းခြံသားထွန်းကြည်တို့၊ ညွန့်ဦးတို့တတွေ အခုတော့ မန္တလေးက ဆရာဝန်ကြီးတွေဖြစ်နေကြပြီ ထင်ပါရဲ့။ ကျောင်းတက်တယ်ဆိုပေမယ့် မှန်မှန်မတက်ဖြစ်ပါဘူး။ ကျောင်းဘက်သွားပြီး သူငယ်ချင်းတွေနဲ့ လက်ဖက်ရည်ဆိုင်ထိုင်၊ စကားတွေပြော၊ ဒါလောက်ပါပဲ။ အဲဒီတုန်းက ကဗျာဆရာဝင်းကြွယ် (အခုသင်္ဘောကပ္ပတိန် ခင်မောင်ဝင်း) က မန္တလေးတက္ကသိုလ် နှစ်ပတ်လည်မဂ္ဂဇင်း အတွင်းရေးမှူး၊ ကျနော်ကလဲ ဖန်မီးအိမ်ကဗျာစာအုပ်ထုတ်ဖို့ ပြင်ဆင်နေတုန်းမို့ ၀င်းကြွယ်က ပုံနှိပ်တိုက်၊ ဘလောက်တိုက်နဲ့ဆိုင်တဲ့ အကူအညီပေးတယ်။ သူငယ်ချင်းမောင်သိန်းနိုင် (ဂုဏ်ထူးဦးသိန်းနိုင်) က ရွှေမန်းတက္ကသိုလ်ဝင်း ကျောင်းဘော်ဒါဆောင်မှာ နေတယ်။ စိန်မြင့် (မောင်မိုးသူ) က နှစ်လည်မဂ္ဂဇင်းအယ်ဒီတာ၊ သူက မန္တလေးဥယျာဉ်တန်းမှာနေတယ်။ ကြည်အောင်က အင်းဝနဲ့ မန္တလေး ယိုးဒယားဈေးနားက သူ့အမကြီးအိမ်မှာ တလှည့်စီနေတယ်။

ကျနော်တို့ ဟော်ကုန်းလမ်း (ဆေးရုံကြီးတောင်ဘက်) မှာ ကဗျာဆရာမျိုးမြင့်ဆွေ (ပန်းချီဆရာ ကိုမြသောင်း) နေတယ်။ ကျနော်တို့ရဲ့ ဟော်ကုန်းရပ်ကွက်ကအိမ်မှာ သူငယ်ချင်းတွေ မကြာခဏ အလည်လာကြတယ်။ သူငယ်ချင်းအပေါင်းအသင်းတွေ ၀င်လိုက်၊ ထွက်လိုက်နဲ့ သိပ်ပျော်စရာကောင်းတာပဲ။

တနေ့တော့ အင်းဝက ကဗျာဆရာ ကြည်အောင် မနက်ကထဲကရောက်လာတယ်။ အိမ်မှာလဲ ဘယ်သူမှ မရှိ။ ကျောင်းဘက်ထွက်သွားကြတယ် ထင်ပါရဲ့။ ကျနော်တယောက်ထဲ ကျန်ရစ်နေခဲ့တယ်။

ကျနော်နဲ့ ကြည်အောင် နှစ်ယောက်သား စကားတပြောပြောနဲ့ ကြည်နူးလို့မဆုံး။ စာအကြောင်း၊ ကဗျာအကြောင်း၊ ရုပ်ရှင်အကြောင်း၊ အကြောင်းတွေစုံလို့။

ဆေးလိပ်ပြာခွက်ထဲမှာ နဂါးစပယ်ရှယ်ဆေးပေါ့လိပ်တိုတွေလည်း တပုံကြီးဖြစ်နေပြီ။

သူတပိုဒ်၊ ကိုယ်တပိုဒ် တလှည့်စီကဗျာစပ်ထားတဲ့ ဗလာစာအုပ်ကလေးလဲ ကျနော်တို့နှစ်ယောက်ကို ငေးကြည့်နေသလိုလို။

ညနေစောင်း ကျောင်းဆင်းချိန်ရောက်လာပြီ။ ကျနော်တို့နှစ်ယောက်ရဲ့ ရယ်သံ၊ မောသံ၊ သက်ပြင်းချသံတွေလဲ တဖြေးဖြေး တိုးသွားပြီ။

ကြည်အောင်က ဆေးလိပ်တွေလဲတိုပြီ၊ နေလဲညိုပြီ၊ ကျနော်ပြန်တော့မယ်တဲ့။

အဲဒီ လျှပ်တပြက်အချိန်လေးမှာပဲ ကျနော်က ဟေ့ ခဏနေဦး … ဆိုပြီး ရှေ့မှာချထားတဲ့ ဗလာစာအုပ် ကလေးထဲမှာ ကဗျာကောက်ခြစ်လိုက်မိတယ်။ “ဧည့်သည်ကြီး” လို့ ခေါင်းစဉ်တပ်လိုက်မိတယ်။

ဆေးလိပ်လည်းတို
နေလည်းညိပြီ
င့ါကိုအိမ်ပြန်ပို့ကြပါလေ။ တဲ့

ကြည်အောင်က “ဟော … ဟုတ်တယ်ဗျို့ .. ကျနော်ပြန်တော့မယ်” တဲ့။ သူပျောက်ကွယ်သွားပါတယ်။

ညပိုင်းကျတော့ သူငယ်ချင်းတွေ ပြန်ဆုံကြတယ်။ နေ့လယ်က ကြည်အောင်နဲ့အတူစပ်ခဲ့ကြတဲ့ ကဗျာတွေ ဖတ်ကြတယ်။ “ဧည့်သည်ကြီး” ကဗျာကိုတွေ့တော့ မောင်စွမ်းရည်က … “ဟာ ကောင်းလိုက်တဲ့ကဗျာ၊ ဖန်မီးအိမ်စာအုပ်ထဲမှာ ထည့်ရမယ်” လို့တောင်းဆိုတယ်။ မောင်စောလွင်ရော ၀င်းကြွယ်ပါ သဘောတူကြတယ်။

ဖန်မီးအိမ် လက်ရေးမူရင်းကို ဒေါင်းနွယ်ဆွေ ပြကြည့်တော့ ဒေါင်းနွယ်ဆွေက ကျနော့်ဆီကို စာရေးတယ်။ “ကိုတင်မိုးရေ .. ခင်ဗျားဟာ … ဧည့်သည်ကြီးကဗျာနဲ့ မှတ်တိုင်စိုက်လိုက်ပြီ” တဲ့။ ကျနော်လဲ “သြော်” လို့ ဆိုလိုက်မိတယ်။

ဖန်မီးအိမ်စာအုပ်ထွက်တော့ ဒီသုံးကြောင်းကဗျာလေးက ဂယက်အရိုက်ဆုံးဖြစ်လာတယ်။“ရေးမိတာက သုံးကြောင်း၊ မေးခွန်းပေါင်းက သုံးသောင်းလောက်ပါလား” လို့ စာပေဟောပြောပွဲတွေမှာ ပြောမိတယ်။

“လေးနက်တဲ့ဘ၀အမြင်” လို့ မှတ်ချက်ချသူက ချတယ်။ ဆောင်းပါးရေးပြီး အနက်ဖွင့်သူကဖွင့်တယ်။ ဘ၀ရဲ့ ဆေးလိပ်မတို နေမညိုမီ မေတ္တာထားကြရမယ်လုိ့ မေတ္တာစကားဆိုသူက ဆိုတယ်။ “ကိုလိုနီစနစ်နေ၀င်ချိန်” ကို အကျစ်လျစ်ဆုံး မှတ်တမ်းတင်ချက်လို့ အနက်ကောက်သူလဲရှိတယ်။ ထောင်ထဲမှာ နံရံပေါ်က ကဗျာအဖြစ် လွမ်းဆွေးသူလဲမနည်းလှ။ “ဗမာပြည်ကို ဧည့်သည်ကြီး နှိပ်စက်ခဲ့တာ (၂၆) နှစ်ရှိပါပြီ။ သူ့ကို မူလနေရာပြန်ပို့လိုက်ကြပါတော့” လို့ ဒီမိုကရေစီအာဇာနည် ဦးဝင်းတင်ကမြင်တယ်။

ဘာပဲဖြစ်ဖြစ် ဒီကဗျာကို ကျနော်မပိုင်တော့ပါ။ ကဗျာဖတ်သူသာ ပိုင်ပါတယ်။ ရေးဖွဲ့သူထက် ဖတ်သူ၊ ခံစားသူက ပိုပြီး သိနိုင်၊ မြင်နိုင်၊ ခံစားနိုင်ပါတယ်။ ရေးသူထက် ဖတ်သူ ပိုတော်ပါတယ်။ “ကျနော်ကတော့ ဘာများတတ်နိုင်ပါဦးမည်နည်း” လို့ ဗန်းမော်တင်အောင်ရဲ့လေသံနဲ့ မှတ်ချက်ချရုံမှတပါး …။ ။

တင်မိုး
(ခေတ္တ ၀ါရှင်တန်ဒီစီ)၂၇၊ ၇၊ ၂၀၀၀

2 comments:

Anonymous said...

ဆရာကြီးတင်မိုးသို့
တောက်...
ကြွေကာသွားပြန်ပေါ့ကြယ်တစ်ပြောက်
မှောင်ပါပြီဆိုမှပြိန်းပြိန်းခြောက်
တို့နိုင်ငံညည့်နက်နက်ကို
အလင်းပေါက်အောင်ကြယ်ကလောင်ထက်ရင်း
သက်တမ်းကုန်ကြွေကာသွားလေတော့
တာဝန်ကျေပါတယ်ကြယ်တာရာရယ်
နောင်ဘ၀သက်တမ်းအတွက်
ထာဝရလင်းလက်လွတ်လပ်ပါစေလို့
အမှောင်ထုတွင်းမှနှုတ်ဆက်ရင်း...

မေဓာဝီ said...

ဧည့်သည်ကြီး ကဗျာကို ဖတ်ပြီး ကျမလည်း အမျိုးမျိုးခံစား ခဲ့ရဖူးပါတယ်။ အသက်အရွယ် အပိုင်းအခြား အလိုက် ခံစားမှုတွေ ကွာခြားခဲ့ပါတယ်။ ခုချိန်ထိလည်း မရိုးနိုင်အောင် ခံစားနေမိဆဲပါပဲ။ ကဗျာတပုဒ် စာတပုဒ်ရဲ့ အနက်ကို ရေးသူကိုယ်တိုင်က ဖွင့်ဟတာထက် ဖတ်သူအမျိုးမျိုးက မတူညီတဲ့ ခံစားမှု အမျိုးမျိုးနဲ့ ခံစားနိုင်တယ် ခံစားခွင့်ရှိတယ် လို့ ကျမတော့ ယူဆတယ်။

“ဘာပဲဖြစ်ဖြစ် ဒီကဗျာကို ကျနော်မပိုင်တော့ပါ။ ကဗျာဖတ်သူသာ ပိုင်ပါတယ်။ ရေးဖွဲ့သူထက် ဖတ်သူ၊ ခံစားသူက ပိုပြီး သိနိုင်၊ မြင်နိုင်၊ ခံစားနိုင်ပါတယ်။ ရေးသူထက် ဖတ်သူ ပိုတော်ပါတယ်။”

ဆရာကြီး ဦးတင်မိုး ဆောင်းပါးရဲ့ ဒီနောက်ဆုံး စာပိုဒ်လေးကို နှစ်သက်မိပါတယ်။
ဆောင်းပါးကို ဖော်ပြပေးတဲ့အတွက်လည်း ကျေးဇူးတင်ပါတယ်ရှင်။